تونس الآن
كتبت الناشطة والرئيسة السابقة لجمعية القضاة كلثوم كنو تدوينة على حسابها في الفايس بوك وجهتها الى النائب جلال الزياتي تساءلت فيها عن مدى مشروعية تبريراته لحكاية صنعه لمليوني كمامة وهو نائب وطلبت منه صراحة الاستقالة وهذا ما جاء في التدوينة :
“كنت نسمع في سيادتك في إحدى الراديوات قلت الي السيد وزير الصناعة اتصل بك على هاتف الشركة متاعك وعرض عليك باش تصنع زوز ملاين لثم ( جمع لثام)
وأكدت الي الوزير ما يعرفكش من قبل وما يعرفش الي انت نائب في البرلمان
باهي .نمشي معك
الوزير ما يعرفكشي الي انت نائب اما انت تعرف روحك الي انت نائب وما عندكش الحق باش تبرم صفقات مع الدولة والا مع الجماعات العمومية حسب الفصل 25 من النظام الداخلي لمجلس النواب
عاد نحب نسألك سيد النائب علاش انت ما قلتش للوزير متاع الصناعة الي ما عندكش الحق باش تقبل الصفقة خاطرك نائب الشعب ؟؟؟؟
ما تقليش حشمت من الوزير والا فكرت في مصلحة البلاد. خاطر فما ناس أخرين كان بإمكانهم يقومو بنفس العمل
سيد النائب المفروض أقل شي تقدم استقالتك من مجلس النواب وتتلهى بمشاريعك في إطار احترام القانون”
