وطنية:
نقلت صفحة النقابة العامة للتعليم الأساسي نصّا منقولا عن أستاذة تدرّس بمعهد فرحات حشاد برادس الذي شهد تصوير أحداث مسلسل الفلوجة.
نقلت صفحة النقابة العامة للتعليم الأساسي نصّا منقولا عن أستاذة تدرّس بمعهد فرحات حشاد برادس الذي شهد تصوير أحداث مسلسل “الفلوجة” الذي يتم بثه على قناة الحوار التونسي خلال شهر رمضان الجاري.
وتحدّثت الأستاذة في نصّها عن ظروف وملابسات تصوير المسلسل بالمعهد كاشفة عن جملة من الحقائق الصادمة بخصوص ذلك.
وكتبت الأستاذة ما يلي:
“حبيت نحكي على المسلسل الجديد متاع الحوار بحكم انو تصور في المعهد متاعي … اولا نيابة على زملائي نحب نوصل صوتنا الي احنا كاطار تربوي كنا ضد الي صار في عقر دارنا اول ما اتضحت الخطوط الكبرى للسيناريو وعرفنا مدى بشاعة المحتوى وقفنا بصوت واحد واستنكرنا انو “الخمج” هذا يتصور في معهدنا الي تشهدلو السنين و الاجيال بعراقتو.
كان الاتفاق مالاول انو باش يقوموا ببعض التحسينات من طلاء و كهرباء و تجهيزات لفايدة المعهد و يخليوهم كي يوفاو التصوير لكن برا شوفوا توا هزوا كل شي حتى الكنابي الي صوروا بيها في قاعة الأساتذة هزوها وجرد الريدو ستور الي ركبوه و فرحنا بيه نحاوه.. جوووووع استخصروا فينا ريدو نحاوه في ويكاند بالغدرة خاتر تحلفنا باش ما نخليوهمش يعريوا قاعة الأساتذة بعد ما ولات لائقة ومحلاها وقلنا توا نحشموهم ونتدللوا عليهم ياخي ما صار شي وفقنا مالحلمة ورجعت سندرلا للواقع المزري متاع المدرسة العمومية و البنية التحتية المهترية.
فريق التصوير عاث فساد في ارجاء معهدنا و استباح كل شبر فيه كما اربك سير الامتحانات وقداش من مرة كي نجيوا داخلين الصباح نخدموا يوقفونا في الباب خاتر يصوروا، وقتها تحركنا وعملنا وقفة احتجاجية على خلفية استباحة فريق العمل قاعة الأساتذة بحضور بعض الزملاء ومنهم انا كنت حاضرة وقمت بطرد التقنين نتفكر نهارها يوم السبت داخلين لقاعتنا بعد خمس سوايع خدمة باش نحطوا ادواتنا ونبدلها حوائجنا نلقاو الفريق قالبها سافيها على عاليها ويديهم في الكازيات متاعنا وحتى الماكينة متاع القهوة الي هي مورد رزق مرا معانا زوالية هلكوها، يا سيدي وكنت نعقل و لقطت طردتهم انا و زميلتي و جاتني “العرفة” واعتذرت واتفقتا انو ما يصوروا كان بعد ما نخرجوا..
وغيره من الصدامات الي عملها الإطار التربوي مع قناة الحوار خصوصا وقت الي ثبتت النقابة في مدى صحة الترخيص واشتمت رايحة تلاعب وتحيل في الوثائق وشبهة فساد … انا حكيت هذا ومازال عندي الكثير منه خاتر حبيتكم تعرفوا الي معهد فرحات حشاد رادس بنساءه ورجاله ولكن تجاوزنا الأمر وتم التصوير والبث وليشهد الجميع ما وصلت اليه البذاءة في قادم الحلقات من أحداث تنحدر بالمربي سواء كان استاذ او قيم او حتى عامل في المؤسسة التربوية لتنشئ جيلا تائها وفارغا بلا هوية.
