المكونات:
300غ نواصر
زوز طروف دجاج
4مغارف زيت زيتونة+ نص فنجان لعجينة النواصر
زوز ريوس بصل متوسطين
زوز مغارف طماطم معجونة
كعبة طماطم
3سنين ثوم
زوز عود قرنفل ملح، فلفل اكحل، كركم
معرفة صغيرة بسباس
فلفل زينة
كعبتين بطاطا صغار
150غ حمص
زوز قرون فلفل
طريقة التحضير:
أول حاجة نحطو الزيت في الطنجرة. نقصو البصل و نرميوه يتقلا، نحطو الطماطم المعجونة و نحركو، تتقلا شوية نقصو كعبة الطماطم على 4 و نرميوها. نزيدو الثوم و توا نحطو طروف الدجاج بعد ما نحيو الجلدة متاعهم. نخليوهم يتقلاو شوية.
نبداو نفوحو: ملح، فلفل اكحل، كركم و بسباسو عود قرنفل.
بعد ما يتقالاو مليح مليح نصبو زوز كيسان ماء ونحطو الفلفل الأحمر حسب الذوق.
نمشيو توا نحضرو النواصر إلّي باش نفورها، ناخذو ال300غ نواصر نبسسوها بالزيت زيتونة و بعد نحطوها في الكسكاس أول ما المرق يهزّ الغليات و مذابينا نخليو 3دقايق و بعد نغطيوها.
نحطو الحمص يطيب في كسارونة أخرى مع الماء و شويّة كركم .
نقشرو البطاطا و نقليوها و بعد نقليو الفلفل. نخليوها الطيب و ديما نتفقدو الماء باش المرق ما يشيحش. و كل شوية نحركو النواصر.
كي تحس النواصر بدأت توالي ترونسبارن نبداو توّا بالمرحلة الجديدة إلّي هي: ناخذو لوش مرق و نسقيو باها النواصر على نار هادئة… و قبل كل مرّة ما نسقيوها نحركوها شوية، نعاودو 3-4 مرات…. و كان في المرّة الأولى نخليوها مغطية من بعد نسقيوها و نخليوها من غير غطا….
من بعد، نقلبوها في وعاء باش تتجمّر في الفور…
نحوطو الدجاج البطاطا، الحمص، الفلفل و نزيدوها لوش مرق…. النواصر تيتاكل سخونة.
