رد النائب ياسين العياري على تصريحات الوزير السابق محمد عبو في خصوصه في حواره الليلة الماضية على قناة “التاسعة” وقال “الكلام اللي قلتو عليا اليوم، السبان و قلة الحياء و الأكاذيب (كيما كل مرة، أنت تتكلم بالأوهام و الطلاسم و أنا أقدم ديما الحجة و الوثيقة و الدليل) يدخل تحت طائلة القانون، فيه الثلب و فيه الهضم، لكن موش بش نشكي بيك في هذه، مسامح في شخصي و متصدق بعرضي على مجاريح السياسة و أتفهم وجعك و حيرتك و احتضارك السياسي و خروجك من الباب الصغير بزوز نقرات من شاب جاهل و فخور بجهله و يقعد لآخر عمره جاهل ويسعى إنه يتطور ويتعلم كل يوم.”
وتابع النائب في تدوينة مطوّلة على صفحته”لكن سألاحقك في حق التوانسة وفي تسترك على فساد الكمامات وأنت تعلم أني أفعل ما أقول، أنت ووزرة البلاستيك واللي كردالك مقر حزبك المخالف للقانون، خاطر هذيكا خدمتي الي نخلص عليها من فلوس التوانسة.”
وأضاف قوله” معلومات جاتك عليا ؟ في وزارة الوظيفة العمومية جاتك بالتأكيد ؟ توة فهمت علاش تحب على الداخلية سي محمد، سي محمد شد جمعة وزير تجسس على معارضيه و خرق معطياتهم الشخصية و شكى بيهم هضم جانب موظف وعمللهم دوسيات باش يكشفها كانتقام ، علاش كنت تعارض في بن علي بربي؟ ..على كل، موش بش نزيد على ما بيك سي وزير الدولة السابق محمد عبو، في السياسة أيضا إكرام الميت دفنه و أنت انتحرت اليوم : كذب، قلة حياء، افتراء، سبيت منخرطيك، سبيت التوانسة، الكلنا خايبين متآمرين فاسدين و أنت فقط.. المهدي المنتظر! ”
وقال النائب”فقط أقدم الأدلة باش التوانسة الي حبيت تغلطهم يثبتوا وحدهم شكون الكاذب شكون يخدم على روحه بجدية وشفافية و وضوح.
بالتوفيق سي محمد في ما تبقى من مسيرتك و طبس راسك و إنت خارج، فكيما قلتلنا أنت عملاق و كيما قاعد ترى، باب الخروج صغير!” وفق قوله.
