خطير / فتاة تتهم منشطا تلفزيا مشهورا بالتحرش بها (صور)

نشرت فتاة تونسية  اليوم السبت تدوينة على مواقع التواصل الإجتماعي […]

نشرت فتاة تونسية  اليوم السبت تدوينة على مواقع التواصل الإجتماعي دعمتها  بمحادثات خاصة قالت انها صادرة عن المنشط التلفزي رضوان الهذلي المعروف بعمي رضوان مؤكدة انه قام بإستدراجها و التحرش بها مفيدة ان الرقم الذي يظهر على محادثات الـ”واتساب” هو رقم عمي رضوان ، و جاء في نص التدوينة ما يلي :

عالسلامة ، السيد هذا أكيد كلنا نعرفوه و تربينا عليه و احنا صغار، و ملا تربية عاد، شاءت الظروف إني نصادفو في حياتي، و عندو سلطة عليا، بدا يحكي معايا بلغة ماحلاك و ما ازينك و ما ابنك و أنا لا ماحلاني لا شي، عادية و أقل ممكن،

قعدت نجاوب فيه بتربية و عيشك عمي رضوان و حشمتني، و كيف بدا يواصل قتلو راني عندي شكون و نحبو و بش نعرس، المشكلة ما نجمش لا نسبو لا نبلوكيه لا نفضحو خاطر اي مشكلة معاه ممكن تؤدي لمشاكل أخرى أكبر و أعمق ليا و لأشخاص غيري و مؤسسة كاملة.

حاولت نستدرجو بالكلام بش يقول كل شي و ما نخرجش انا ضالمتو ولا فهمتو بالغالط، حكيت بتربية قد ما انجم. يقول القايل علاش جيت توا نحكي؟

خاطر خممت اللي فما بنات غيري ينجم يصير عليهم هكا و يسمعو كلامو و يمشيو معاه و يحطمو حياتهم على أساس علاقتهم بيه تنجم توصلهم للشهرة و المجد، كيف ما ينجم يكون تحرش بصغار ملايكة ما يفهمو شي.

الشخص هذا خطر على بلادنا و أولادنا و تربات عليه أجيال، في الاخر نحب نقول لكل مرا ما تغركش الهالة البرانية و لا الإسم ولا الشهرة، الذئاب البشرية تعيش معانا و لابسة احسن لبسة و تحكي بأحسن منطق.
سامحوني نحكي من faux profile
أما تعرفو الناس ما ترحمش في تونس